公眾污名
其實污名有好多唔同種類，上面提及嘅就係公眾污名。公眾污名反映喺我哋自身嘅態度以及大眾媒體對有精神病經歷的人的描述 (Mak, Chong, & Wong, 2014)。
公眾污名會影響社會結構以及政策，導致結構性污名 。公眾污名亦都會限制咗精神病復元人士喺生活中嘅各個範疇，包括就業、住屋、學業、人際關係等等 (Parcesepe & Cabassa, 2013)。
例如公眾污名會令到僱主抗拒聘請復元人士，或令到懷疑有精神病嘅人因為驚被歧視而抗拒求醫等等。
自我污名
自我污名係復元人士內化咗其他人加諸喺自己身上嘅污名。例如有人會認為復元人士係軟弱、改變唔到嘅，復元人士亦可能因爲咁而覺得自己係軟弱同改變唔到。
自我污名會令復元人士有自卑、無能嘅感覺、負面嘅自我形象同埋認為自己俾人歧視嘅遭遇係自己攞嚟，結果令佢哋隔絕身邊嘅人、貶低自己同隱瞞病情 (Corrigan, Larson, Rüsch, 2009; Mak & Cheung, 2010)。
咁樣唔單止無助佢哋改善精神健康，仲會影響佢哋他們嘅復元進程。
禮儀污名和連帶污名
禮儀污名 (courtesy stigma) 即係大眾因為照顧者、家人或朋友同復元人士嘅關係而對他們有污名化嘅現象 (courtesy stigma; Angermeyer, Schulze, & Dietrich, 2003)。
咁樣會令到同復元人士有較密切關係嘅人有更多嘅心理困擾同負擔佢哋亦都有機會內化呢啲污名，導致有連帶污名，影響佢哋嘅身心健康。
佢哋亦可能因為想避免被污名化，而隱瞞自己同復元人士嘅關係，或者疏遠復元人士，去削弱同復元人士之間嘅連繫(Mak & Cheung, 2008)。
專業人員嘅污名
專業人員嘅污名係由醫療同社會服務提供者加諸喺復元人士身上嘅污名。醫療同社會服務提供者本來應該係復元進程裏面關鍵嘅角色。
但令人詫異嘅係，絕大部份曾經住院嘅復元人士喺住院期間都有負面嘅經歷，包括沖涼嘅時候俾人望、員工態度惡劣、被要求進行清潔嘅工作、過份束縛、唔公平嘅膳食安排、缺乏獲得資訊嘅途徑同完善嘅投訴機制 (Lee, Chiu, Tsang, Chui, & Kleinman, 2006)。
你我都會受影響
其實精神病污名唔單止會影響有精神病經歷嘅人，仲會影響我哋每一個人。當精神病被污名化，連情緒困擾都可能會被覺得係軟弱嘅表現。正因為咁，當我哋覺得唔開心嘅時候，可能會因為擔心其他人對我哋嘅看法而選擇唔同人傾訴。當我哋出現精神困擾嘅症狀，我哋都可能因為社會上對精神病嘅污名而擔心其他人對自己嘅睇法，然後隱藏自己嘅情況同埋唔去尋求專業協助。去污名化可以俾我哋所有人有更大嘅空間談論精神健康議題，令大眾更加重視精神健康(Henderson, Evans-Lacko, & Thornicroft, 2013)。
精神病污名以外…
唔單止有精神病經歷嘅人會俾人污名化，社會上有好多唔同弱勢社群都會受污名影響。好多主流唔接受嘅特質，例如唔同嘅種族、宗教、性傾向、性別認同、身體障礙等等，都有機會被污名化。去污名就係撇除表面嘅標籤同假設，令大家唔再俾污名蒙蔽雙眼。既然世界上有咁多人有住唔同嘅性格、外貌、身型，我哋都可以容納有唔同嘅種族、性傾向、身體障礙等嘅人，等大家能夠擁抱多元同欣賞每個獨一無二嘅人，真真正正連繫身邊每一個人。
大家都出一分力，先可以慢慢咁減少污名。等我哋一齊建造一個無污名嘅社會！
