唔完全係。污名呢個詞語其源自希臘文，意思係一啲烙印喺囚犯、奴隸身上嘅印記或紋身，等人可以一眼就分辨出佢哋嘅身分， 係一啲喺社會上被視為有瑕疵嘅人。呢個污名被視為羞辱、不光彩或不被接受嘅標記。

所以污名唔單只係一個負面標籤，而係一個深深地烙印喺一個人身上嘅印記，唔單止係短暫地掛喺一個人身上嘅標籤。

其實歧視只係污名嘅一部份。污名包含三個部份：

（一）無知，即係對精神病嘅誤解同知識上嘅缺乏；
（二）態度與偏見，即係對有精神病經歷嘅人抱有負面感覺，例如焦慮、憤怒、怨恨、敵對、厭惡；
（三）行為上嘅歧視，即係拒絕同排斥有精神病經歷嘅人 (Thornicroft et al.,  2007) 。

換言而之，歧視（例如因為一個人嘅精神病經歷嘅人而拒絕聘請佢哋或拒絕佢哋租借房屋嘅申請）只係污名嘅其中一部分。而歧視亦好大機會由污名嘅其他部分 – 刻版印象同偏見所引致。

其實，無話咩係一定唔講得嘅，當中視乎整個對話嘅背景，講者嘅態度、意思等。所以，呢個問題可能要問返我哋自己。

喺講呢一句說話之前，大家可以用心去沉澱一下自己講呢一句說話背後嘅意思、聽者聽到嘅感受。到底，我哋係咪因為污名，假設有精神病就會行為異於常人，定係純粹係攞嚟去抒發自己當刻驚嘆（或其他）嘅情緒？例如當朋友同你講，佢會毅然辭去工作環遊世界，而你回應道：你係咪癡線㗎！呢句說話背後，會唔會假設咗有精神病嘅人會有異於一般人嘅行為，或者想法同一般人唔同，所以你先用「癡線」你嘅朋友呢？就算對方冇精神病，我哋日常生活講嘅說話都有可能鞏固緊精神病污名。

我哋可以嘗試改變自己對有精神病經歷嘅人嘅態度同埋諗法，或者進一步採取行動改變構成社會地位不平等關係嘅現況。

我哋可以從認識咩係精神病開始。對精神病嘅誤解同知識層面嘅缺乏會形成刻版印象，例如覺得有精神病就等於失去思考能力、無法康復，而呢啲都唔係事實。要減少污名，除咗增進知識之外，其實親身同有精神病經歷嘅人接觸同溝通，都係一個好有效嘅方法。透過教育自己同接觸相處，可以令我哋有機會審視自己一直以嚟嘅假設究竟係咪真實，從而減少污名。  

跟住就到日常生活中嘅語言，呢個係減少污名和打破同精神病相關嘅負面刻板印象嘅重要因素。我哋可以多啲留意日常用語，使用復元為本嘅字眼，減低復元人士得到社會大眾支持嘅障礙。

以下係一啲復元為本用字上嘅建議：

有精神病經歷嘅人 VS 精神病人

精神病並唔係一個人嘅全部，就好似有人有鼻敏感，有人有哮喘；有啲人性格內向，有啲人性格外向。精神病經歷只係一個人嘅一部分，並唔可以定義一個人嘅本質。

正常 VS 唔正常／我哋 VS 佢哋   

呢個世界本身就有好多種人，當我哋每個人都係攞住自己把尺去定義正常定唔正常，睇到嘅世界就會狹窄咗好多。每個人嘅生活方式、思考模式都可以好唔同，我哋亦無需要因為呢啲唔同去刻意區分我哋同佢哋。

當然，好似之前所提及，如果我哋每個人都多啲企出黎發聲，例如喺遇到歧視時挺身而出、喺社交媒體上分享一啲有關精神病嘅資訊，咁個影響就嚟得更大啦！

(資料來源：說書人StoryTaler Facebook page ）

網上有唔少人提議Dos & Don’ts，列出有咩可以講，有咩唔可以講，令唔少人都好驚講錯嘢，好似咩都唔講得… 咁樣反而令人同人之間更加有隔膜。同人連繫無一條方程式，當我哋參考嗰啲建議用句時，需要明白說話背後嘅精神、潛台辭同態度，而唔係好似背書咁背咗佢。點解呢句說話講得，點解呢句又唔講得，點解照講都好似無用咁，其實都有背後嘅原因。

呢個係一個唔能夠三言兩語回答嘅問題，唔係「好」同「唔好」咁簡單。建議你仔細閱讀呢個網頁，了解更多。

參考資料

Thornicroft, G., Rose, D., Kassam, A. & Sartorius, N. (2007). Stigma: ignorance, prejudice, or discrimination? British Journal of Psychiatry, 190 (3), 192 – 193.